عرسان الفيس بوووووك

برن جرس الباب بروح صاحب البيت يفتح بلاقي الجماعة جايين على الموعد بالزبط ، الجماعة اللي همّه الشاب واسمه “سمير” وإمه وأبوه، جايين يخطبوا البنت واسمها “سارة”… برحّب فيهم أبو سارة، وبعد السلام والكلام ومرحبا فيكم وكيف الحال، وبدور الحوار التالي:

أبو سارة: ها يا سمير، شو بتشتغل؟

سمير: أنا بشتغل في مجال الإنترنت.

أبو سارة: مُبرمج يعني؟ ما شاء الله.. ممتاز.

سمير: لا يا عمّي أنا مش مبرمج.

أبو سارة: أكيد مُصمّم غرافيك إذا هيك.. هاد المجال إلو مستقبل كبير.

سمير: لا عمّي أنا حاليا مشرف منتدى الأغاني في موقع “كراكيب دوت كوم” وقريباً رح أمسك إشراف منتدى المسلسلات التركية في موقع “سلامتك من الهسهس دوت نت”.

أبو سارة: مشرف كيف يعني؟

سمير: يعني انا بضيف مواضيع وبحط أغاني وبعمل اشتراكات بأسماء وهمية عشان أحرّك المنتدى وهيك يعني.

أبو سارة: والله منا فاهم شي.. يعني كم بدفعولك بالشهر في هاد الشغل؟

سمير: لا يا عمّي أنا اللي بدفع لصاحب المنتدى عشان أصير مشرف... بس قريباً رح أفتتح المنتدى الخاص تاعي.

أبو سارة: ومنتداك الخاص وين راح يكون مكتبه؟

سمير: حالياً من البيت ولما الله يفتحها علينا بستأجرله مكتب.

أبو سارة: وهاد المنتدى شو راح تستفيد منّو؟

سمير: كيف شو أستفيد منّو..؟!.. أنا رح أفتح المنتدى وأحط فيه برامج ومسلسلات وألعاب والأعضاء راح يشتركوا فيه ويصير منتدى
مشهور جداً.

أبو سارة: يعني العضو كم بدفع اشتراك؟

سمير: لا يا عمّي.. العضو ما بدفع اشتراك.. أنا بدفعله عشان يشترك.

أبو سارة: لا حول ولا قوة إلا بالله.. يعني مصدر رزقك من وين يا ولد؟

سمير: لمّا يكبر المنتدى وأنشره على فيس بوك راح تيجيني إعلانات بالهبل.

أبو سارة: والله منا فاهم شي.. طيب إنتا محوّش كم؟

سمير: أنا يا عمّي وما بدي أخبّي عليك، عندي حاليا 99 دولار في
Google Ad-sense
ووعدوني يبعتولي الشيك بعد شهرين ورح يكون وضعي المادي ممتاز، حتى إذا بدك بجيبلك براءة ذمة من
PayPal

أبو سارة: الله يقضّي هالليلة على خير بس... طيب انتا من وين بتعرف سارة بنتي؟

سمير: تعرفت على سوسو بالـ
Face book
وكنا نبعت مسجات ونعمل لبعض
poke
أحيانا..

أبو سارة: ويعني معرفة النت بتكفي إنك تيجي تخطبها؟

سمير: آآآه يا عمّي.. ما انتا مش عارف.. أنا
جبت 80% في الـ
quiz
تاع سوسو

أبو سارة: شو هاد الـ كويز؟

سمير: معقول يا عمي ما بتعرف كويز
Do you know me?
على
Face book

أبو سارة: لا بعرفوش.. وبعدين مين هاي سوسو؟

سمير: يا الله يا عمي.. معقول كمان ما بتعرف انو سارة اسمها سوسو على
Face book

أبو سارة: لا بعرفش أنو سارة اسمها زفت.

سمير (بكل بُرود): انتا زعلت يا عمي؟

أبو سارة (بعصبية): بتعرف إذا ضليت قدامي كمان 10 ثواني شو بعمل فيك؟

سمير (بإبتسامة غبية): أكيد بدك تضيفني على
face book
وتكتبلي على الـ
wall
تاعي، صح؟

أبو سارة: براااااااااااااااا